Amakuru

Uruganda rwa skol rugiye kwifashisha abanyarwenya kwamamaza ishusho nshyashya skol lager

Uruganda rukora ibinyobwa bisembuye n’ibidasembuye rwa ‘Skol Brewery Ltd Rwanda’ rwahinduye ishusho ya Skol Lager ikunzwe na benshi kugira ngo irusheho gufasha abanywi bayo kwizihirwa no kwishimira ubuzima.

Byatangajwe kuri uyu wa Gatanu tariki 16 Kanama 2019, mu kiganiro n’Abanyamakuru ubuyobozi bw’uru ruganda bwatangarijemo ko bugiye kwifashisha Abanyarwenya bakomeye mu Rwanda, mu bukangurambaga bwiswe ‘Live-Lough-Lager’ bwo gushishikariza abanywi ba Skol Lager kuyinezererwa, baseka banishimira ubuzima.

Muri iki kiganiro cyabereye mu kabari kazwi nka Plus250, Kicukiro nibwo hasobanuwe impamvu bifashishije abanyarwenya aho ubuyobozi bwa Skol bwatangaje ko ari ukugira ngo abanyarwanda bajye banywa Skol Lager banaseka kuko iyo usetse iminsi yo kubaho iriyongera.

Ubuyobozi Mukuru ushinzwe ubucuruzi n’imenyekanishabikorwa muri Skol, Paul Norris yavuze ko Skol Lager nshya ifite umwimerere nk’uw’iyari isanzwe ahubwo icyahindutse ari uburyo igaragara inyuma aho iriho abantu bishimye.

Yagize ati “Duharanira gukomeza gushimisha abakiliya bacu, abakunzi b’ibinyobwa byacu niyo mpamvu duhora dushaka uko twahanga udushya hagamijwe kubanezeza.”

“Skol Lager twazanye ntabwo ari nshya ahubwo ni isanzwe, yengetse uko bisanzwe kandi n’uburyohe ni ubusanzwe ariko icyo twakoze ni uguhindura ishusho yayo mbese n’ibigaragara inyuma ku icupa byahindutse.”

Ushinzwe imenyekanishabikorwa mu ruganda rwa Skol, Anitha Haguma, yavuze ko ibinyobwa bya Skol bikunzwe n’abantu kubera uburyo byoroshye kandi biryoha ari nayo mpamvu bifuje kurekera Skol Lager umwimerere wayo ahubwo bakayiha ishusho nshya.

Yakomeje avuga ko bagiye kwifashisha abanyarwemya babarizwa muri Comedy Knights, aho bazajya basanga abanywi ba Skol aho bari hose haba mu tubari n’ahandi bakabasetsa.

Ushinzwe ikinyombwa cya Skol Lager muri Skol, Benurugo K. Emilienne yagize ati “Ni ishusho yonyine yahindutse kuko abantu benshi bakunda ikinyobwa cyacu uburyo cyoroha kandi kimara inyota niyo mpamvu tutigeze tugihindura ahubwo twahinduye ishusho”.

Benurugo avuga ko hari indi gahunda izatangizwa yo kujya bashyira urwenya ku mbuga nkoranyambaga cyangwa kuri radio zitandukanye, bikajyana n’amarushanwa y’abantu bazajya bohereza urwenya hagatoranywa abatsinze bagahabwa ibihembo.

Skol yatangiye gukorera mu Rwanda mu myaka itanu ishize, ibasha gukora ibinyobwa bingana na hegitolitilo (hl) ibihumbi 80 ku mwaka, ariko mu 2015 yatashye umuyoboro mushya uyifasha kwenga hegitolitilo (hl) ibihumbi 200.

Ubuyobozi bw’uru ruganda butangaza ko rufite ubushobozi bwo kwenga hegitolitilo ibihumbi 500.


To Top