Inkuru z'urukundo

Umuraperi ukomeye yakoreye ubukwe muri gereza.

Umuhanzi Valsero uri mu bakora injyana ya Hip Hop bakomeye muri Cameroun yakoreye ubukwe muri gereza n’umukunzi we.

Valsero yasezeraniye muri gereza n’umukunzi we Erja Kaikkonen usanzwe ari Umudipolomate nk’uko Jeune Afrique yabitangaje.

Valsero, Umuraperi w’impirimbanyi ya Politiki muri Cameroun yakoreye ubukwe muri gereza

Erja Kaikkonen ukomoka muri Finlande asanzwe ari Umuyobozi Mukuru w’Intumwa z’Umuryango w’Ubumwe bw’Ibihugu by’u Burayi mu Murwa Mukuru wa Cameroun, Yaoundé.

Ubukwe bw’aba bombi bwabereye mu Gereza nkuru ya Yaoundé. Iby’umunezezo w’urukundo rw’aba bombi byamenyekanye muri Mata uyu mwaka.

Valsero yafunzwe ku wa 26 Mutarama 2019 azira kugaragaza ibitagenda ku buyobozi buriho atavuga rumwe nabwo.

Valsero, ubusanzwe yitwa Gaston Philippe Abe Abe. Yavutse ku wa 12 Nzeri 1975. Yagiye kuba muri Cameroun mu 1987 i Yaoundé aho yabanaga na se.

Mu 1990 nibwo yatangiye kugaragaza impano mu kurapa mu itsinda yabagamo ryitwa Ultimatum; mu 2008 ashyira hanze album ye ya mbere yise ‘Politiquement Instable’ yatumye agira igikundiro, abato batangira kumufata nk’uwavamo umuyobozi mwiza kandi w’umunyabwenge.

Valsero yibonye nk’umuraperi w’umunyapolitiki atangira kuririmba ibihangano byibasira Perezida w’igihugu cye Paul Biya w’imyaka 86 birimo “Çe pays tue les jeunes”, “Ne me parlez plus de ce pays” yamenyekanye cyane nka “Lettre au president” n’izindi.

Valsero yagiye afungwa kenshi (nk’uko n’ubu bimeze azira kutavuga rumwe n’ubutegetsi buriho mu gihugu cye) ndetse n’ibitaramo bye akenshi bikaburizwamo. Aheruka gushyira hanze album mu 2015 yise ‘Intensité’.

Click to comment

Leave a Reply

Your email address will not be published. Required fields are marked *

To Top