Amakuru

Umujura yagiye kwiba mu rusengero rwa PEFA, agezemo asiga ibaruwa isaba imbabazi.

Umujura utaramenyekanye mu ijoro ryo ku Cyumweru tariki ya 14 Nyakanga 2019, yatoboye urusengero rwo mu gace ka Nyandarua, anandika ibaruwa asaba imbabazi kuri icyo gikorwa.

Ni icyemezo yafashe nyuma yo kugera mu rusengero rwa Pentecostal Evangelistic Fellowship of Africa (PEFA) akabura amafaranga nyamara yari yabwiwe n’umwe mu bahasengera ko hari ayasigayemo.

Mu ibaruwa ye yagize ati “Natumwe hano n’umwe mu bakirisitu banyu wambwiye ko hari amafaranga yasigaye mu rusengero ariko ntayo nasanzemo. Imana ibahe umugisha mwese kandi munsengere. Murakoze.”

Uyu mwanditsi asoza ibaruwa agaragaza ko ariwe watoboye akinjira mu rusengero.

Rev. Pasiteri Wanyoike yavuze ko umujura yinjiye mu rusengero nyuma yo gutobora urukuta rukoze mu mabati.

Yagize ati “Twasanze ibaruwa mu rusengero ubwo polisi yarigiye gutangira iperereza. Yatekerezaga ko harimo amafaranga (umujura). Twamubabariye kandi turi kumusengera kugira ngo akizwe. Ahawe ikaze kuza kwihana no gusengana natwe.”

Abasengera mu rusengero rwa Pentecostal Evangelistic Fellowship of Africa na bo batangaje ko bababariye uyu mujura banagaragaza ko bakozwe ku mutima n’igikorwa yakoze cyo kwandika ibaruwa.

Faith Wairimu utuye mu Mujyi wa Engineer yatangaje ko “Icyadukozeho ni ibaruwa yo kwicuza. Yanyuze mu rusengero hose ashaka amafaranga hanyuma aza kwandika ibaruwa asaba imbabazi mu mukono we. Agomba kuba yaraje mu rusengero cyangwa hari uwamuhaye amakuru. Igishoboka ni uko yibeshye ku gihe. Akeneye amasengesho.’’

Nation yanditse ko ibi byabaye mu gihe abaturage baheruka kwica abantu batatu bakekwagaho kwiba mu nsengero.

Umuyobozi wa Polisi mu gace ka Nyandarua, Gedion Ngumi, yatangaje ko iperereza kuri ubwo bujura ryatangiye.

To Top