sport

Rutanga yahishuye impamvu nyamukuru yamugaruye muri Rayon Sports.

Rutanga Eric w’imyaka 27, amaze imyaka ibiri muri Rayon Sports nyuma yo kuva muri APR FC yakurikiyemo. Yayifashije kwegukana igikombe cya Shampiyona y’uyu mwaka w’imikino 2018/19 ndetse bageranye muri ¼ cya CAF Confederation Cup ya 2018 no ku mukino wa nyuma w’Igikombe cy’Amahoro cya 2018.

Uyu myugariro w’ibumoso wa Rayon Sports n’ikipe y’igihugu Amavubi, Rutanga Eric yagarutse mu Rwanda nyuma yo kunaniranwa n’ikipe ya Nkana FC yo muri Zambia, yari yagiye kumvikana na yo mu mpera z’ukwezi gushize.

Uyu mukinnyi yaraye agaragaye mu mukino w’umwanya wa gatatu Rayon Sports yatsinzemo Police FC mu Gikombe cy’Amahoro ndetse yatanze umupira wavuyemo igitego cya mbere cyatsinzwe na Ulimwengu Jules.

Abajijwe impamvu yagarutse mu Rwanda n’uko ibiganiro byagenze hagati ye na Nkana FC, Rutanga Eric yemeje ko atabashije kumvikana n’iyi kipe yo muri Zambia yashakaga kumwishyura mu bice.

Ati” Nari nagiye kumvikana na Nkana FC ariko ntabwo ibiganiro byagenze neza. Nagezeyo, ibyo twari twavuganye bashaka kubigabanya, ndababwira ngo ntabwo bishoboka, bagabanyamo makeya, ngerageza kwemera ariko noneho bambwira ko bayampa mu bice, mbabwira ko bidashoboka.”

Rutanga avuga ko yari yaganiriye na Usengimana Faustin bakinanye muri APR FC na Rayon Sports (kuri ubu wakiniraga Buildcon FC yo muri Zambia), akamubwira ko baramutse bamuhaye amafaranga mu bice hari ayo atazabona.

Ati” Nari nabanje kuganira na Faustin hari n’abandi bakinnyi bakinana bayibayemo, barambwira bati iyi kipe iguhaye amafaranga mu bice, andi ntabwo bayaguha.”

Nyuma y’uko ibi biganiro byari bimaze kuzamo kidobya, Rayon Sports ngo yasabye uyu mukinnyi ko agaruka bakumvikana kugira ngo bakomezanye kuko yari imaze gutakaza abakinnyi benshi barimo abagiye muri APR FC.

Ati” Rayon Sports yambwiye ko inkeneye, kuko hari abakinnyi benshi bari bamaze kugenda, barambwira ngo nze mbafashe ko amafaranga bayampa. Bambwiye ko naza nkabafasha nk’umukinnyi umaze kuba mukuru, banyoherereza itike ndaza. Ntabwo turaganira, nari ntegereje uyu mukino kandi babanje no kuganira n’abavuye muri APR.”

To Top