sport

Mugiraneza Jean Baptiste yerekeje mu ikipe irigukina CECAFA.

Uwahoze ari kapiteni wa APR FC, Mugiraneza Jean Baptiste ‘Migi’ yashyize umukono ku masezerano y’imyaka ibiri muri Kinondoni Municipal Council F.C. yo muri Tanzania, iri no gukina irushanwa rya CECAFA Kagame Cup riri kubera mu Rwanda.

Mugiraneza Jean Baptiste yasinyiye KMC yo muri Tanzania

KMC FC iri mu itsinda rya mbere hamwe na Rayon Sports, Tout Puissant Mazembe yo muri Repubulika Iharanira Demokarasi ya Congo na Atlabara FC yo muri Sudani y’Epfo.

Iyi kipe isinyishije Mugiraneza nyuma y’iminsi mike adafite ikipe kuko yirukanwe na APR FC mu mpera z’ukwezi gushize.

Uyu kapiteni wungirije mu ikipe y’igihugu ‘Amavubi’, yafashije Azam FC kwegukana CECAFA Kagame Cup ya 2015 no kugera mu ijonjora rya kabiri rya CAF Confederation Cup ya 2015/16.

Muri Mutarama 2018 ni bwo Migi yasubiye mu ikipe y’Ingabo z’u Rwanda, ayifasha gutwara shampiyona ya 2017/18 na Super Cup 2018. Gusa yisanze mu bakinnyi 16 basezerewe ubwo ubuyobozi bwa APR FC bwakoraga impinduka zikomeye nyuma yo kutegukana igikombe na kimwe mu mwaka ushize w’imikino.

KMC Migi yerekejemo, muri CECAFA Kagame Cup uyu mwaka imaze kubonamo inota rimwe yakuye kuri Atlbara FC banganyije igitego 1-1 ku Cyumweru, mu gihe yaraye itsinzwe na TP Mazembe igitego 1-0.

Iyi kipe izahagarira Tanzania muri CAF Confederation Cup ya 2019/20, izasoza imikino yo mu itsinda A rya CECAFA Kagame Cup ku wa Gatandatu, yisobanura na Rayon Sports mu mukino uzabera kuri Stade ya Kigali i Nyamirambo.

To Top