Amakuru

Mu Rwanda moto zikoreshwa lisansi zigiye gusimbuzwa iz’amashanyarazi.

Perezida Kagame yahishuye ko hari umushinga uri hafi gutangira mu Rwanda, aho moto zikoreshwa na lisansi zigiye gusimbuzwa izikoresha amashanyarazi mu rwego rwo kurengera ibidukikije no gukomeza gutuma u Rwanda ruba igihugu kirangwa n’isuku.

Umukuru w’igihugu yabivuze kuri uyu wa Gatatu ubwo i Rusororo mu Intare Conference Arena hari hateraniye urubyiruko rurenga ibihumbi bitatu rw’imbere mu gihugu no mu mahanga mu biganiro byari byiswe “MeetThePresident”.

Perezida Kagame yavuze ko hari umushyitsi wari wasuye u Rwanda baherutse kuganira, amugezaho igitekerezo cyo gukoresha moto z’amashanyarazi.

Yavuze ko ubu iby’ibanze biri gukorwa kugira ngo zinjizwe ku isoko ry’u Rwanda ku buryo zasimbura izisanzwe zikoresha lisansi kuko zo zangiza ibidukikije mu gihe izindi nta kibazo na kimwe zitera.

Ati “Turashaka ko mu Rwanda twagira moto zikoresha amashanyarazi gusa, ziriya zindi zose kubera ko zitwangiriza umwuka duhumeka, ubwo tuzava aho tujya no ku modoka.”

Umukuru w’Igihugu yavuze ko mushinga ujyanye n’aho igihe kigeze, ndetse uri no mu nyungu z’abanyarwanda; gusa yamaze impungenge abari basanzwe bafite moto, ko batazahatirwa gutunga ubwo bwoko bushya ahubwo ko bashobora kuguranirwa bagahabwa izo zigezweho.

Ati “Ntabwo tuzajya tubambura gusa ngo tubagurishe izo, tuzashaka uburyo tuzigurana. Ab’umwuga wa moto ndagira ngo mbategure, muzadufashe kubyihutisha igihe bizaba byatangiye.”

Mu Ukwakira umwaka ushize, mu Rwanda hatangiye igerageza rya moto zikoresha amashanyarazi bigizwemo uruhare na Sosiyete yitwa Ampersand izobereye mu bijyanye n’ibinyabiziga bikoresha ubu bwoko bw’ingufu.

Igerageza ry’ibanze ryerekanye ko moto itwara abagenzi ishobora gushyirwamo umuriro ikagenda ibilometero 65, inafite umuvuduko wo hejuru y’ibilometero 80 mu isaha.

Icyo gihe uhagarariye Ampersand mu Rwanda, Hakizimana Emmanuel, yatangaje ko bamaze kuganira n’abamotari n’inzego za leta, n’igerageza rya mbere bakoze ryerekanye ko isoko ry’u Rwanda ribereye kuzanaho moto ikoresha amashanyarazi.

Ati “Tuzubaka ahantu hatandukanye mu Mujyi wa Kigali ku buryo abakiliya bacu bazagira ahantu hatandukanye bazajya bashyiriramo umuriro cyangwa se bashobora kuzana batiri yari ishizemo umuriro, agahabwa indi agakomeza urugendo.”

Iri koranabuhanga rishya rizatuma umumotari umwe abasha kwizigama amadolari ya Amerika 900 ( asaga ibihumbi 700 Frw) ku mwaka ugereranyije n’igihe yaba akoresha lisansi.

Ku rundi ruhande, Umuyobozi w’ishami ry’uruganda rwa Volkswagen ruteranyiriza imodoka mu Rwanda, Michaella Rugwizangoga, yavuze ko mbere y’uko uyu mwaka urangira ruzaba rwagejeje ku isoko ry’u Rwanda zimwe mu modoka zarwo zikoresha amashanyarazi.

Yavuze ko mu myaka itatu ishize ubwo Volkswagen yashakaga kwagura ibikorwa byayo hanze ya Afurika y’Epfo bikagera muri Afurika yo munsi y’ubutayu bwa Sahara, barebye ku bihugu byinshi bitegereza ubukungu, umutekano, politiki, amahoro n’ibindi, u Rwanda ruza ku isonga.

Ati “Nk’uko mubizi hagezweho gukoresha amashanyarazi. Kuva mu 2025, VW Group izakora imodoka zikoresha amashanyarazi gusa, kandi mbere y’uko umwaka wa 2019 urangira, tuzaba dufite imodoka zikoresha amashanyarazi mu Rwanda, dutangire kwitegura umwaka wa 2025 n’ibihe biri imbere.”

Inganda zikomeye nka General Motors na Volkswagen zikomeje gushyira imbaraga mu gukora imodoka zikoresha amashanyarazi gusa, zisimbura izari zatekerejweho mbere zihuza uburyo bw’amashanyarazi n’ibikomoka kuri peteroli zo mu bwoko bwa hybrid.

Ni uburyo buzahuza neza n’amabwiriza akomeje gushyirwaho yo kugabanya imyotsi isohorwa n’imodoka, mu rwego rwo kurengera ibidukikije no kurwanya ihumana ry’ikirere.

To Top