Football

Dore uko amakipe azahura muri 1/4 mu Gikombe cya Afurika 2019.

Imikino ya 1/8 mu Gikombe cya Afurika kiri kubera mu Misiri yasojwe kuri uyu wa Mbere, yasize Tunisia isezereye Ghana kuri penaliti 5-4 mu gihe na Côte d’Ivoire yageze muri ¼ isezereye Mali nyuma yo kuyitsinda igitego 1-0 mu mukino wari wabanje.

Ghana yihariye umukino wayihuje na Tunisia mu Mujyi wa Ismailia ndetse yashoboraga gufungura amazamu ku munota wa 15, umupira washyizweho umutwe na Mubarak Wakaso ugarurwa n’izamu, usubijwemo na André Ayew, ukurwamo n’umunyezamu Mouez Hassen.

Nyuma y’ishoti ryatewe na Afriyie Acquah, habura iminota ine ngo amakipe yombi ajye kuruhuka, André Ayew yatsindiye Ghana, ariko umusifuzi avuga ko hari mugenzi we, Wakaso, wakoze umupira n’ukuboko.

Tunisia yahushije uburyo bwa mbere bukomeye muri uyu mukino, ku munota wa 70, ubwo Wahbi Khazri yahinduraga umupira yahaye Taha Yassine Khenissi, akananirwa kuwushyira mu izamu n’ubwo yibwiraga ko Kasim Adams yawukoze n’ikiganza.

Nyuma y’iminota ibiri umupira wa Yassune Khenissi ugaruwe n’umutambiko w’izamu, Wahbi Khazri yacomekeye undi Wajdi Kechrida n’agatsitsino, na we awuhindura mu izamu, usanga Khenissi wahise awushyira mu rushundura n’ishoti rikomeye.

Ghana yishyuye ku munota wa mbere w’itanu y’inyongera, ku gitego cyavuye ku mupira w’umuterekano ubwo Thomas Partey yari amaze gukinirwa nabi na Sassi, maze Rami Bedoui aritsinda.

Iminota isanzwe yarangiye amakipe yombi anganya igitego 1-1, hongerwaho indi 30 itagize icyo itanga, Tunisia iyibyaza umusaruro ubwo yasimbuzaga umunyezamu, Mouez Hassen aha umwanya Farouk Ben Mustapha ku munota wa nyuma.

Ben Mustapha yafashije igihugu cye gukomeza kuko yakuyemo penaliti ya gatatu ya Ghana yatewe na Caleb Ekuban mu gihe abandi base bazinjije, umukino ukarangira Tunisia ikomeje kuri 5-4.

Undi mukino wa 1/8 wabaye kuri uyu wa Mbere, warangiye Côte d’Ivoire isezeye Mali ku gitego 1-0 cyatsinzwe Wilfried Zaha ku munota wa 76.

Imikino ya ¼ izatangira kuri uyu wa Gatatu tariki ya 10 Nyakanga, izasozwe ku wa Kane tariki ya 11.

Uko amakipe azahura muri ¼ cya CAN 2019 iri kubera mu Misiri

Tariki ya 10 Nyakanga- Sénégal vs Bénin (Stade du 30 Juin, 18:00 )

Tariki ya 10 Nyakanga- Nigeria vs Afurika y’Epfo (Cairo, 21:00)

Tariki ya 11 Nyakanga – Algérie vs Côte d’Ivoire (Suez, (18:00)

Tariki ya 11 Nyakanga – Madagascar vs Tunisie (Al Salam, 21:00)

To Top