sport

Dore amakuru agezweho mu mupira w’amaguru i Burayi: Bolasie, Sanchez, Ribéry, Ozil, Coutinho

Umukinnyi wo ku ruhande ukomoka muri Repubulika ya Demokarasi ya Kongo Yannick Bolasie w’imyaka 30, arashaka kuva mu ikipe ya Everton, amakipe yo muri Turukiya ya Besiktas na Trabzonspor akaba amwifuza. (Sun)

Manchester United na rutahizamu ukomoka muri Chili Alexis Sanchez w’imyaka 30, banze ko yerekeza mu ikipe ya Roma, na nyuma yuko Manchester United yemeye kuriha igice kinini cy’umushahara we w’ibihumbi 560 by’amapawundi ku cyumweru. (Mirror)

Ariko Sanchez biracyashoboka ko yakwerekeza muri shampiyona y’Ubutaliyani izwi nka Serie A, mu gihe Manchester United yamwemereye kugirana ibiganiro na Inter Milan, aho yakwemera kugabanyirizwa umushahara. (Mail)

Liverpool ishobora kunguka miliyoni 18 z’amapawundi mu gihe uwahoze ari rutahizamu wayo Philippe Coutinho, Umunyabrezili w’imyaka 27, yaba yerekeje muri Bayern Munich avuye muri Barcelone ku nguzanyo. (Mail)

Everton yahawe amahirwe yo kugura Franck Ribéry w’imyaka 36, umukinnyi wo ku ruhande wahoze akinira Ubufaransa, kuri ubu udafite ikipe akinamo nyuma yo kuva muri Bayern Munich yari amazemo imyaka 12. (90Min)

Hagati aho, umukinnyi wo hagati w’Umunyaportugali Renato Sanches w’imyaka 21, arashaka kuva muri Bayern kubera ko adakinishwa. (Sport1)

Umukinnyi Mesut Ozil w’imyaka 30 biracyashoboka ko ava muri Arsenal akerekeza muri DC United yo muri Amerika mu gihe iyi kipe yaba ishoboye kumvisha uyu wahoze akina hagati mu ikipe y’igihugu y’Ubudage ko akwiye kuyijyamo. (Star)

Umukinnyi myugariro Serge Aurier w’imyaka 26 ukomoka muri Côte d’Ivoire, biracyashoboka ko yava muri Tottenham akerekeza muri AC Milan mu gihe umukinnyi myugariro w’iyi kipe Andrea Conti w’imyaka 25 yaba ayivuyemo mbere yuko igura n’igurishwa ry’abakinnyi ku mpeshyi i Burayi rirangira. (Calciomercato)

Rutahizamu Mario Balotelli w’imyaka 29 wahoze akinira Manchester City na Liverpool ari hafi kwerekeza mu ikipe ya Brescia yo muri Serie A. (Sun via La Gazzetta)

Rutahizamu Neymar wa Paris Saint-Germain w’imyaka 27, ntabwo ari mu bakinnyi b’iyi kipe baza gukina na Rennes kuri iki cyumweru kubera imvune, ntabwo atari ukubera ko uyu Munyabrezili ashaka gusubira muri Barcelone. (AS)

Umukinnyi mushya wa Manchester United Hannibal Mejbri, wageze muri iyi kipe avuye muri Monaco kandi kuri ubu akaba atemerewe gushyira umukono kuri kontaro kugeza ubwo azaba yujuje imyaka 17 mu kwezi kwa mbere k’umwaka utaha, arashaka kujya yambara nimero 7 yagiye yambarwa n’abakinnyi bakomeye muri iyi kipe. (Mirror)

To Top