Amakuru

Abantu batekeye umutwe abanyarwandanda muri Kigali convention Center ubushinjacyaha bwabagarutseho.

Ubushinjacyaha bukuru bwasabye ko ikibazo cy’ifungwa ry’abantu bakurikiranyweho ubutekamutwe bwabereye muri Kigali Convention Centre mu minsi ishize, cyaharirwa inkiko kuko arizo zizafata umwanzuro wa nyuma hakurikijwe amategeko.

Ku wa 25 Kamena nibwo abantu ibihumbi biganjemo urubyiruko bakoraniye kuri Kigali Convention Centre, bavuga ko batumiwe mu nama yiswe ’Wealth and Fitness Summit’.

Bavugaga ko bijejwe ubumenyi ku kwihangira imirimo na $197 kuri buri muntu, ariko basabwa kubanza kwishyura nibura 4,500 Frw kugira ngo bemererwe kuyitabira.

Nyuma yo gutahura ko uburyo byateguwe harimo amanyanga, inzego zirimo Urwego rw’Ubugenzacyaha, RIB na Polisi, zijeje abatanze amafaranga ku babiteguye bazayasubizwa, n’ababikoze bakabibazwa.

Mu bafungiwe icyo gikorwa uko ari abagabo babiri n’abagore babiri, harimo abanya-Kenya batatu Charles Chege Kinuthia, Rachel Matipei Nashipai na Vivian Khisa Mukhwana Mutenyo n’umunyarwanda Mohamad Niyonkuru.

Bagejejwe imbere y’urukiko rwa Kagarama bahakana ibi byaha ndetse basaba ko bakurikiranwa badafunzwe, ariko urukiko rwanzura ko batagomba kurekurwa.

Gusa muri iyi minsi ku mbuga nkoranyambaga hakomeje abantu bavuga ko aba banya-Kenya bakwiye kurekurwa, bakavuga ko ari bo basigaye muri gereza, ibintu Ubushinjacyaha buvuga ko bikwiye guharirwa inkiko.

Umushinjacyaha Mukuru, Jean Bosco Mutangana, yabwiye itangazamakuru ko ibirimo gukorwa n’u Rwanda bikurikije amategeko, bityo n’umwanzuro uzafatwa ari yo uzakurikiza.

Yagize ati “Ubushinjacyaha bwakoze iperereza, burega abakekwaho icyaha kandi harimo n’umunyarwanda, nabonye basa naho bavuga ko ari Abanya-Kenya gusa. Ni urukiko rwabafunze ndetse barajurira, rugumishaho icyemezo. Nta n’umwe urarekurwa kandi dosiye yashyijirijwe urukiko ngo biburanishwe mu mizi.”

“Basabye urukiko gusuzuma niba barekurwa by’agateganyo bakaburana bari hanze, urukiko rukaba rutaraburanisha ubwo busabe bwabo. Bafunzwe mu buryo bukurikije amategeko kandi ibyemezo by’inkiko utabyishimiye arabijuririra. Bityo icyo kibazo, kimwe nk’izindi manza zose, giharirwa inkiko mu bwigenge bwazo.”

Abavuga ko aba banya-Kenya bakwiye kurekurwa, banabihuza no kuba Charles Chege Kinuthia wari wateguye icyo gikorwa muri Kigali Convention Centre yari akubutse muri Nigeria aho yakoze nk’ibyo bari bateguye muri Kigali Convention Centre, kandi ngo nta kibazo byateje.

Click to comment

Andika igitekerezo cyawe hano

To Top