sport

Uwahoze Ari perezida wa Real Madrid yishwe na coronavirus

Lorenzo Sanz wahoze ari Perezida w’ikipe ya Real Madrid yaraye apfuye nyuma yo kujyanwa mu bitaro arwaye coronavirus.

Sanz wari ufite imyaka 76 y’amavuko, yayoboye Real kuva mu mwaka wa 1995 kugera mu wa 2000, muri icyo gihe Real yegukanye igikombe cya Champions League inshuro ebyiri.

Lorenzo Sanz Duran, umuhungu we, yanditse ku rubuga rwa Twitter ati: “Papa wanjye yapfuye”.

Muri ubwo butumwa bwo kuri Twitter yongeyeho ati:

“Ntiyarakwiye kurangiza ubuzima bwe muri ubu buryo. [Ni] Umwe mu bantu beza cyane, b’umuhate mwinshi cyane kandi bakunda gukora cyane nigeze nabona mu buzima bwanjye. Umuryango we na Real Madrid ni bo yari yarihebeye”.

Sanz ni we waguze abakinnyi nka Roberto Carlos, Clarence Seedorf na Davor Suker ubwo yayoboraga iyi kipe ya Real ifite ibikombe 33 bya shampiyona ya Espanye izwi nka La Liga.

Yatsinzwe amatora yo mwaka wa 2000 na Florentino Perez, ari na we uyoboye Real kugeza ubu.

Umuhungu wa Sanz, Fernando w’imyaka 46 y’amavuko, yakiniye Real Madrid kuva mu 1996 kugeza mu 1999, mbere yuko imyaka irindwi ye ya nyuma akina umupira w’amaguru ajya kuyisoreza muri Malaga.

To Top